Mittwoch um 18 Uhr ist Küeraomd im Heimathaus Hauenhorst

De Hiärwt is dao. Wat is et ne Pracht wenn man nao buuten kik. De Sunne, de nu nich mäer so pielhauge an`n Hiëmel stait, straolt up usse schöne Land un et is baole so äs wen se de ganze Äer met bar Gold anstrieken will. De lesden Bloomen blait un de Baime sit`t stiefull von dat lekkere Obst wat wi äs Kinner so gäene iäten daihen. Un dat häb wi äs Blagen, wenn et nän iäben müeglik was, sibitzt. Män nich uut ussen eegenen Gaorn. Nä, de Appeln von ussen Naober smöken allemaol biätter äs de, de wi söwwes harren. Un de häb wi us haalt. Män wi mussen uppassen. De Naober pös up äs n Luchs un wenn he us söög un to pakken kreeg dan gaw ewt üörndlik wat upt Jass. Män wi häbt et üöwerstaon. Un Appeln klauen, dat was wat, wat us Blagen tostönn. In Hambuorg häbt se dao sogar n eegen Leed drüöwer maakt. Un dat wilt wi män füste Gunsdag Aobend singen wenn wi us, äs immer, Abends klok sess int Heimathuus unnern Boosen to`t Waterdüöersken driärpt.